曼聯港招兵 拓亞太業務

【明報專訊】英超勁旅曼聯今季雄風不再，跌落聯賽榜第7位，但Emily講個好消息畀曼迷聽﹕曼聯終於請人啦！嗱嗱嗱，各位球迷唔好開心住，佢哋唔係請新領隊，領隊莫耶斯仍然屹立未倒，只係曼聯喺香港jobsDB落咗招聘廣告，誠聘全職分析員。


請分析員 做得好可轉長工

噚晚車路士主場以3:1技術性擊敗曼聯，入到第3球時，看台上嘅前領隊費格遜仲用手掩眼，無眼睇呀。唔知曼聯係唔係驚再輸落去，會嚇親贊助商，所以諗定新財路，嚟香港賺自由行嘅人仔？曼聯就喺招聘廣告中話，佢哋要拓展亞太區業務，諗住喺香港開番間辦公室，所以先請個全職分析員，幫助撰寫市場報告同物色商機，又話分析員主要有4個職責﹕發掘新商機、撰寫市場分析報告、建立商業資料庫及為公司草擬研究報告。


咁各位想「入魔」嘅朋友仔，如果你有商科嘅大學學位，非常好嘅書寫、溝通同分析能力，加上英語流利，又有志於建立品牌嘅工作，咁曼聯就歡迎你。份工初步合約為期3個月，喺香港工作，表現良好嘅有機會變成長工！