大輝自言飄逸任性 暫不入黨

【明報專訊】工業界議員林大輝同地區組織公民力量一向友好，早前公民力量區議員集體加入新民黨，消息令大輝情歸新民黨行情看漲，但大輝大師噚日話自己性格比較「飄逸、任性同自發」，所以決定暫時都係做個無黨無派嘅獨立議員適合啲。


雖然無入黨計劃，但大輝仍盛讚兩個組織嘅合併，形容公民力量喺沙田地區政治能量好強，而新民黨喺葉太領導下質素好高。不過，佢強調自己之前幫公民力量區議員潘國山補選站台，只係因為友情，又形容喺新東出選嘅自由黨田北俊「政治、經濟質素」都好高，唔會因為新民黨跟公民力量合併而被「knock down（打低）」。


大輝又話佢自細喺新界長大同讀書，對新界特別有感情，對包括直選等平台都會積極考慮，現時主要同政黨就議題合作，亦有同鄉議局主席劉皇發保持聯絡。


講到特首選舉，大輝話，日後特首最重要幫到香港發展，有幾點，包括要熟悉工商發展、管治能力強、明白低下階層民情、能夠做到人和。佢形容特首梁振英「管治能力應有，人和差少少」，又話特首熱門、政務司長林鄭月娥工商知識相對弱少少，但可搵人幫手。最好人選就係立法會主席曾鈺成，可惜佢已表態唔選特首。