北上置業棠哥佔領中山

【明報專訊】佔領中環呢個議題相信同政改分唔開，噚日行政會議成員鄭耀棠都話佢哋搞「佔中」，但講緊嘅「中」係中山而唔係中環。唔少政界人都喺中山買樓，棠哥亦喺上面置業9年，佢話當年幾個工會朋友去其中一人嘅中山屋企玩，男人打牌之際，女人當然行街，結果成班女人就落訂買樓花，4個家庭夾埋買咗中山凱茵新城嘅別墅。


棠哥話呢個有4伙人嘅別墅，每層都1500呎，仲有4000呎大花園，總共有12間客房同16個廁所，認真誇張，由於4家人都係工會朋友，所以佢哋打通嚟用，有時更一齊喺大草地開番幾圍食飯，十分熱鬧。


家由深圳灣上中山只需1個鐘車程，令唔少政界人士都鍾意上去買樓度假。棠哥話，民政事務局前常任秘書長李麗娟等亦喺中山置業，現任同前任政務官加埋有成60人北上買樓，對方同棠哥住嘅地方只係20分鐘車程，但佢哋未有時間約埋一齊玩。喺香港無物業嘅政務司長林鄭月娥，上年10月亦向行會申報同老公共同喺中山持有自住物業，齊齊佔領中山。