財爺中蛋衣 警留做證物

【明報專訊】財政司長曾俊華去年12月初同特首梁振英落區，出席地區諮詢會期間，慘遭示威者雞蛋擲中，整污糟件adidas外套，原來呢件外套仍然被警方留起做證物，「鬍鬚曾」笑問Emily，唔知件外套會唔會洗乾淨先畀番佢呢？

笑問歸還「會否洗乾淨」

當日鬍鬚曾如常返學校教劍擊，隨即就去諮詢會，所以趕唔切換番件靚西裝，便著住運動外套做嘢，錯有錯着啦，當日有兩名示威者衝出嚟朝梁振英擲公仔同雞蛋，一眾保安衝上前護主，鬍鬚曾亦轉個頭望向人群，就係咁先至無正面「食蛋」，但件運動外套就有蛋醬。


Emily請教退休警司劉達強，佢話如果件證物價值連城，警方為安全起見，影張相就會歸還，但如果事主同意而證物唔係好貴重，通常都會留起作呈堂之用，至於會留幾耐，就要因應案件同法庭安排，但警方唔會幫人清潔證物嘅，睇嚟財爺都要自己洗衫喇。