里昂風水測馬年恒指破兩萬八

【明報專訊】馬年奔騰而來，里昂噚日就公布咗一年一度嘅風水指數。因為今年係甲午木馬年，而木利火，火能夠燒旺市場氣氛，所以里昂話今年恒指簡直係「憤怒的公牛」，有望衝擊28,105點。而屬土嘅樓市就危危乎，唔單止樓價隨時跌一成，而且由西北去到東南全部方位都係凶位，投資者如果信佢，就快啲賣樓買股咯。


去年預測與恒指走勢背馳

里昂風水指數推出20年來，準確度一路好波動，上年蛇年恒指預測就完全錯晒（見圖），不單止走勢同實際情况背道而馳，板塊吉凶亦完全顛倒。上年最當炒嘅科網竟然係凶，而最差勁嘅金融股卻係吉。里昂自己就話，呢個風水指數做咗20年，有一班風水大師指點，唔係隨隨便做出來嘅，不過準確度高於50%的時間只有一半。


睇番今年，里昂話2014年的玄空飛星圖與1969年恒指誕生嗰年如出一轍，加上木火相疊，今年港股簡直旺到係憤怒的公牛。其中2至3月、5至7月會最旺，下半年則開始回落。


若以金木水火土來睇板塊，屬木嘅農業、林業、零售當然拔得頭籌，最值得投資；其次係屬火嘅廣告、娛樂、公用、油氣、科網，料全年穩紮穩打、無大起大落；屬水嘅博彩、酒店、航空航運、飲料釀酒都算唔錯，下半年更好。而因為利金之水乾涸、馬嘅八字中缺土，所以屬金、屬土嘅就最差。金會點金無術，土更加要小心土崩瓦解，所以屬金嘅汽車、銀行保險，屬土嘅房地產、醫藥、化妝品都要盡量忍手勿掂。


木克土、房地產屬土，樓市就更加唔掂得。里昂估今年樓價跌10%，明年再跌5%。尤其係西北至東南方位嘅物業全部處於凶位，元朗、朗屏及上環、堅尼地城有機會馬失前蹄，呢啲地區嘅業主要特別小心。


email: [email protected]

[小琴密語]