教院微博抽獎谷人氣

【明報專訊】家時興喺社交網站搞活動搞宣傳，估唔到連院校都搞埋一份。最近教院教育及人類發展學院罕有地喺微博辦「新年我請客」抽獎活動，送出7份共值5000元嘅獎品。參加辦法好簡單，網民只要關注學院嘅微博同轉載指定內容，就會有機會贏到1000元薄餅店現金券或者500元雪糕店現金券，已經有超過15萬人參加抽獎，推算中獎率少過0.005%。


教院：獎品不涉公帑

Emily問過教院，教院發言人話利用社交媒體推廣係新嘗試，稍後會檢討活動成效，再決定係咪繼續採用同一模式推廣，強調獎品唔係用政府撥款購買，唔涉及公帑。


不過Emily留意到，今次送出嘅獎品只能夠喺香港用到，但係微博用家以內地人居多，唔知主辦活動嘅學院係咪希望想吸引內地網民贏到獎品後嚟香港旅遊消費，促進本港經濟？

活動被指太商業化

教院諗新招做宣傳，但教育政策關注社主席張民炳就認為，今次活動太過商業化，有違教院辦學原則，即使不涉公帑亦唔適合，認為不宜再辦呢類活動。