康泰黃士心退而不休

【明報專訊】不少退休人士都希望繼續工作，康泰旅行社創辦人黃士心（Jackie）肯定就係呢批「退而不休」人士。噚日廣東省政府帶內地同香港唔少媒體參觀康泰深圳分行，Jackie現身到深圳向傳媒簡介業務，仲話囝囝康泰董事總經理黃進達唔得閒嚟，先至會「代子從軍」，認真廿四孝。


Jackie年前退下火線，將業務交畀囝囝打理，但呢位旅遊業老將似乎放唔低興趣，計劃緊寫10本旅遊書，已經出版咗3本，今年仲打算去新加坡帶團。噚日包括新華社、《人民日報》等到咗康泰深圳分店，了解CEPA下嘅粵港服務業融合情况，Jackie親自接待。Jackie話，旅行社去到深圳，有啲「水土不服」，去年9月開店至今都仲處理緊同領事館搞客人簽證嘅問題，又要同內地各個單位打好關係。佢又話，深圳分店至今都未有錢賺，期望今年可以有微利。