黎年：笑住退休

【明報專訊】2009年4月開始出任申訴專員嘅黎年今年3月底會離任，噚日佢公布2013/14年度第3期《申報》報告，畀在場記者問今次係咪任內最後一次以專員身分出席記招，黎年笑住話要視乎同事工作進度，睇下可唔可以趕得切3月再有報告「出爐」。


黎年強調，唔續任純屬私人原因，話如果再做5年專員，對佢個人黎講任期太長，強調無政治考慮，呼籲外界毋須做無謂揣測。佢又話公署工作唔難做，而且做得非常開心，仲盛讚一眾同事表現優秀，「我唔係唔開心咁離開」。對於離任後打算，黎年賣關子話「好多嘢諗緊」，會唔會再做公職人員？「未知㗎。」


做公職人員？ 「未知㗎」

噚日申訴專員公署其中一份報告講屋宇署處理高官等知名人士僭建個案進展緩慢，黎年亦不能倖免，畀在場記者「翻舊帳」，講返2011年6月畀本報查到佢自住嘅薄扶林碧林大廈有僭建，佢重申「話僭建係好無辜」，強調純粹係大廈有斜坡要維修，家工程已完成晒，正等緊署方審核。