環境局否認陸恭蕙辭職

【明報專訊】梁振英政府最近傳出幾個高官諗住早啲離開熱廚房，其中最大粒係環境局副局長陸恭蕙咁話，《晴報》話坊間流傳佢要辭職，話係「真假難辨」。不過噚日環境局出稿高調回應，話嗰篇報道「在任何方面均毫無事實根據」。


出稿指報道「毫無事實根據」

另一被傳離職高官係民政事務局常任秘書長楊立門，有傳53歲嘅佢申請提早退休，有別於陸恭蕙高調澄清，楊立門噚日唔答自己係咪想走。喺福建嘅特首梁振英，兩度唔答記者有關提問。咁樣回應，難怪會有人問唔通真係有嘢？


日前有講法話，盛傳同政務司長林鄭月娥不和嘅楊立門，雖然未夠55歲，但已經申請提早退休；而55歲嘅財經事務及庫務局常任秘書長區璟智就如期申請退休。財經事務及庫務局確認區璟智會按程序做，民政事務局長曾德成就對記者話，唔會評論人事問題，但佢非常依靠常任秘書長推動局方嘅工作。


曾德成唔評論人事問題

至於陸恭蕙辭職傳言，政府就緊張得多，除咗發出聲明，環境局長黃錦星亦同記者講傳聞並無事實根據，絕無此事，仲話今屆政府嘅問責團體同心同德，用心用力工作。