政黨年宵旺市

【明報專訊】每年都有唔少團體喺維園擺年宵攤位，今年雖然有唔少檔位話生意暫時一般，但唔少政黨包括建制或泛民，都話今年旺丁又旺財。公民黨嘅「馬上普選」玩具小馬銷情理想，即場加價後都好多人買；民建聯就話福袋嘅銷情超乎想像，銷情比上年多1倍！


公民黨「馬上普選」加價

公民黨毛孟靜同Emily講，第一日年宵嘅「業務」已經蒸蒸日上，300套「馬上普選」玩具，第一日已賣100套，難怪佢哋加價10蚊，賣到38蚊都唔擔心啦。梁家傑仲笑住話今年「四袋同堂」，有余若薇同佢揮毫嘅環保袋、筆袋、公文袋同文件袋。


民建聯福袋吸舊客

舊年賣蛇齋餅糉福袋嘅民建聯，今年繼續走福袋路線，袋內有米粉、烏冬、豆豉鯪魚、粟米蓉同數碼收音機。民建聯代表話有好多舊客今年返嚟幫襯，銷情超乎想像，但強調「絕不加價」，照賣68蚊。


支聯會第一日嘅銷情都好理想，主席李卓人話賣出咗200隻6.4GB USB記憶棒，加埋捐款有成4萬蚊。佢仲話聽到唔少市民講，記憶棒可以好容易拎返大陸，所以呼籲大家買番隻帶返鄉下。


其他政黨成績都唔錯，工聯會王國興就有好多人搵佢寫揮春，主要寫龍馬精神同身體健康，不過，都有人搵佢寫金句「日以繼夜」。王國興由噚日下午1點寫到5點，話寫到攰咯。工黨就話，民運人士王丹同藝人黃耀明嘅親筆簽名文件套會壓軸推出，大家留意喇。