去花市被掟中 譚志源輕鬆笑對

【明報專訊】政制及內地事務局長譚志源噚日去維園年宵，幫經民聯主持年宵攤位開幕儀式，兼派政改宣傳單張。不過局長「人氣爆燈」，被大批示威者包圍，搞到寸步難行，仲先後被一個「你呃人」咕打中頭，同黃色膠狀物體擲中面。局長依然神情輕鬆，保持微笑，聽到一示威口號仲笑出聲。

譚志源一去到維園就引大批團體趁機示威，要求公民提名。學民思潮成員向譚志源遞信表達訴求，而社民連同熱血公民成員就不斷追住佢高呼「不要假諮詢」、「譚志源落地獄」等口號，局長大批便衣警員保護下神情輕鬆。不過，由於示威者聲浪太大，佢聽唔清楚記者提問，笑住話靠「估估」去回應。

最終由於場面太過混亂，譚志源被大批示威者阻攔，佢無留維園派傳單，反而經民聯副主席林健鋒同保安局長黎棟國就派30分鐘。譚局長被人攔途示威，但佢都有去檔口幫襯購物，支持學生售賣產品。

至於局長被掟中，警方就證實一名女子涉普通襲擊被捕，獲准保釋候查。