股市跌 議員唔郁住

【明報專訊】本港股市噚日跟隨外圍一齊大跌，跌咗473點，跌幅逾2%，跌穿22000點水平，即使係「大笨象」匯豐銀行（0005）都走唔甩，跌咗2.3元，跌到82.1元，低過50天平均價。不過，唔知係咪股市前景唔算清晰，Emily噚日問過唔少立法會議員，佢哋都無打算蛇年完結前入貨，只係打算按兵不動。


明燈麥美娟：等運到

民建聯副主席蔣麗芸向來買開股票，亦手持匯豐，個市跌咗唔少，佢會唔會改變投資策略，或者趁低位入貨呢？佢就同Emily講，過年後先再考慮喇。至於自稱為「股壇明燈」嘅工聯會麥美娟就話，通常佢一入市，朋友就會散貨，見到個市咁，佢決定「咩都唔郁」，都係等運到先喎。


佢嘅黨友黃國健就話，自己一直無買股票，太太就持有匯豐，不過佢都唔知太太乜嘢價位買入，或持貨幾多，但形容老婆買股票就好似談戀愛咁，買完就唔會放。


對於股市大跌，佢話跌幾蚊無咩大傷害，話買匯豐都係打算長揸，「如果匯豐冧到無人要，相信香港經濟都冧！」