唐唐盼政制「人馬合一」

【明報專訊】Emily前晚喺中環置地廣場見到唐英年筵開兩席，同一班前年競選特首時嘅競選辦人員敘舊，隔兩枱就係經民聯石禮謙同立法會帳委會開餐，場地係佢哋老友、經民聯監事會主席林建岳新開嘅餐廳China Tang。成個組合唐營色彩甚濃，有人話唐唐席間四圍搵人碰杯飲酒，連隔兩枱嘅石禮謙都飲到盡興離場。


同競選辦敘舊 唐營玩得盡興

可惜Emily前日未能同唐唐拜早年，不過唐唐好識做，噚日提早發新聞稿，話想同全港700萬市民拜年，佢仲「以馬論馬」，講番佢嘅新年願望。


唐唐話，政制發展似馬術障礙賽，希望最終「人馬合一」，越過難關到終點；仲要喺內地、海外「賽馬」，喺經濟競爭中要步步領先。至於社會發展，就要好似馬術盛裝舞步賽，和諧優美又流暢咁話。


打工仔唔好「做牛做馬」

唐唐希望香港人好似馬咁雄壯，香港繼續「馬照跑」，工程要「上馬」，計劃要「去馬」，公司要有「千里馬」，打工嘅唔好「做牛做馬」，人人「馬力十足」，自然就「馬到功成」。