一哥送書畀卿姐

【明報專訊】警務處長曾偉雄噚日到立法會講解上年嘅罪案情况，議員劉慧卿好關心警員點樣處理家暴問題。一哥就話，上年家暴刑事案有1870宗，雖然下跌132宗，但「清官難審家庭事」，警方查家暴案時，要跟隨「處理家庭暴力事件小冊子」（圖2），裏面有一系列注意事項，查其他案都無咁嘅要求咁話。


警方處理家暴書 卿姐希望警加強培訓

卿姐對一哥手中嘅「黃書仔」好有興趣，會後去問曾sir借嚟睇，曾sir好大方，送咗本書畀卿姐。Emily八卦問卿姐借本書仔嚟睇，入面提到警務人員緊記處理家暴要有同情心同諒解態度。卿姐笑笑口咁話，即係以前啲警察無同情心啦。呢本書又話，叫警察唔好將家暴當一般家事處理，唔好加入個人價值觀同評語。


卿姐話，以前接觸過一些個案，警方叫兩公婆「牀頭打交牀尾和」，大事化小，家有本書仔係好事，證明警方重視家暴案，希望佢哋加強培訓。