新聞類別
港聞
詳情#
【明報專訊】有官員埋怨「廚房熱」,中電就起咗個清涼廚房,畀中小企參考點樣可以慳番筆電費,回本期唔可以太長,但又可以保持食物質素喎。中電呢個剛翻新、位於深水埗嘅「綠倍動力」節能中心,其中節能餐廳最令Emily感到興趣,因為有唔少創意嘅電能煮食爐具。
自動炒飯機 慳電慳人手
中電市場及客戶服務業務部總監周立文展示售價1.6萬元嘅「自動炒飯機」,幾分鐘就可將一碗隔夜飯連同配料炒得熱騰騰,周立文親自將飯分成幾份請在場記者食,大家都讚。佢話,自動炒飯機除咗較傳統爐具節省七成電力,重點係可省人手,慳番唔少成本。
低溫煮食 1個月回本
大家去茶餐廳都鍾意飲奶茶,而中電個清涼廚房仲有「低溫煮食機」同「自動冲奶茶機」,售價分別係1萬元及2.2萬元,睇落幾貴,但節能中心職員話,有中小企買咗部奶茶機,約1個月就回本,認為值得投資,最重要係個廚房唔會熱辣辣,員工可以舒舒服服咁做嘢,無咁易辭職。
回應 (0)