白金卡折扣跌呢 迪士尼：訂房仍較抵

【明報專訊】迪士尼樂園去年底宣布加價，不單成人門票加到499蚊，連「奇妙處處通」年票亦加價超過一成，最貴嘅白金卡加至2888蚊。Emily收到讀者投訴，話自己係白金卡會員，明明張卡今年3月底先到期，買嘅時候喺園內商店購物有八折優惠，但今年1月1號起，年票嘅條款改咗，佢買嘢得番九折優惠，要同收費平啲嘅銀卡同金卡睇齊，覺得好離譜。


Emily問過迪士尼樂園，對方話雖然3款卡嘅購物優惠睇齊咗，但其實樂園仍然有其他優惠，例如今個月4號至3月31號期間，白金卡會員有高達七折酒店訂房優惠，即使呢段特別時間以外，仍享有七五折訂房折扣，比其餘兩張卡都抵。迪士尼又話考慮咗市場情况同賓客消費習慣先調整優惠，優惠一向亦定期更新，並會個別通知會員。