劉鳴煒同80後講港獨

【明報專訊】青年事務委員會（COY）噚日舉行青年交流會，邀請新任COY主席劉鳴煒同70幾個15至29歲嘅青年交流。有參加者提到「港獨」問題，劉鳴煒話無論青年人鍾唔鍾意，香港都係中國嘅一部分，但的確歷史文化同內地城市唔同，所以佢認為提倡港獨，或者將香港內地化，兩種極端都唔啱。


「政府似父母，其實好關心青年人」

參與者又提到青年反政府嘅趨勢，劉鳴煒話相信無一個政府想民望低，仲形容政府好似父母咁，其實都好關心青年人，只係價值觀同追求嘅嘢唔同。佢認為政府制訂政策時，應該多配合青年人嘅價值觀。


鼓勵青年長途車把握時間睇書

會上有自稱住喺天水圍嘅28歲青年話，每日用四五個鐘搭車，人生好似得番工作同搭車，想約friend都無時間，覺得好絕望。劉鳴煒問佢做咩工，呢個青年話佢做政府工，朝9晚5，但亦認識有街坊每日做12個鐘，做足6日。台下唔少人即刻議論紛紛，劉鳴煒就建議佢掌握好時間管理，同埋唔好浪費搭車嘅時間，睇多啲書。