董生頻論政 田少有意見

【明報專訊】全國政協副主席、前特首董建華7個月開咗4次記者會撐政府，而因為叫特首梁振英考慮辭職而被褫奪全國政協委員嘅自由黨田北俊，噚日連董建華都批評埋，話如果前特首耐不耐就出嚟講吓嘢，都唔知會對現屆政府有正面定負面影響。田大少仲話，好彩另一前特首曾蔭權無出嚟講嘢，如果唔係唔知點處理。


話董離任時民望唔高

田大少噚日先後喺電台節目同立法會審議預算案時，談論董伯伯近期成日論政一事，佢話董生用前特首身分議政，對香港管治唔係咁好，仲質疑對方2005年離任特首時民望都唔高，事隔10年出嚟講嘢，佢就睇唔通對市民有幾大說服力喇。


田少喺立法會發言時話，董伯伯幾次都喺前任特首辦開記招，但佢本身係全國政協副主席，一般人代、政協聯絡工作都係經中聯辦處理，所以若董建華要發表意見，係咪應該另覓地方？佢話﹕「全國政協副主席喺香港講嘢，都唔太恰當，係都喺中聯辦講啦！」

田少話，擔心前特首經常出嚟發表意見，會惹起「架牀疊屋」嘅觀感，「會否太多大廚喺廚房，搞到廚房嘅菜愈嚟愈『橫』（壞了事）呢？我都有啲擔心」。不過，田少隨即又補一句，董嘅言論支持政府，「董生當然沒有問題」。