亞視4月未有糧出

【明報專訊】亞視承諾又落空，亞視執行董事葉家寶噚日寫網誌，開場白即同員工道歉，話公司收入唔可以如期到帳，所以出唔到4月糧，仲話全力爭取涉事公司收入可以下星期初到位，希望可以5月7日（下周四），即係法定支薪日之前出糧，不過始終交代唔到亞視未來方向，下周三會開員工大會，講公司最新狀况。


下周員工會交代方向

其實亞視話過今個月底會交代公司未來方向，但葉噚日喺網誌話，據佢了解股東同投資者正與一家財團密切洽商，仲話已經多次同股東、投資者表明，事情唔可以再拖，希望洽商可以盡快有結果，解開大家嘅疑惑同焦慮。