五一遊行搵band唱工運歌

【明報專訊】每年五一勞動節發起大遊行嘅職工盟，今年遊行前後搞搞新意思，請咗本地老牌社運民謠音樂人Billy同年輕樂隊Speechless，分別喺起點維園同終點政總公民廣場外唱工運歌《愛的征戰》同《這世界決不割賣》，仲有外傭團體跳舞，令遊行加多咗啲嘉年華氣氛。


職工盟總幹事蒙兆達話，今次算係新嘗試，希望用音樂感染人，「唔使再下下嗌口號」，仲透露職工盟同音樂創作人周博賢合作，月中會出一隻叫《野火》嘅CD，寓意工人抗爭野火燒不盡，收錄10幾首工運歌，內容希望帶出改善勞動階層生活嘅訴求。


（余瑋攝）