鍾庭耀：董思維停喺2000

【明報專訊】香港大學民意研究計劃總監鍾庭耀噚日同自由黨田北俊一齊開記招，講解政改民調。會上有人提出點解民調問題係問市民支持定反對政改方案，而唔係問立法會應唔應該通過政改方案，仲引述全國政協副主席董建華上星期講，民調點樣問就可以得到點樣嘅結果。鍾庭耀聽到董生個名即刻有反應，話董先生呢種思維，反映「董先生停留喺2000年嘅印象」。


點解鍾庭耀要揀2000年嚟回應董生？唔通鍾庭耀為當年嘅民調風波耿耿於懷？當年民調風波，時任特首董建華被指透過特首辦高級特別助理路祥安，向港大施壓，要求鍾庭耀停止特首評分民調，後來引起軒然大波，之後時任港大校長鄭耀宗請辭。董建華上星期見記者時，講起民調一事，就拋下一句民調「信不信由你」。


噚日係五四運動96周年，鍾庭耀喺開場白都不忘講吓五四運動，佢話五四運動最重要嘅精神，就係將科學同民主喺中國發揚光大。香港家面對迫切嘅政改問題，用科學民主嘅精神處理係一個進步。對於今次田北俊贊助做嘅民調，鍾庭耀形容係「超級大型民調」，有高啲嘅參考價值。


董今介紹「團結香港基金」工作

董建華今日又會出嚟見大家，佢會以「團結香港基金」主席身分開記招，介紹基金會工作規劃，唔知佢嘅工作計劃，會唔會包括做吓民調蒐集民意呢？