詩姐讚魯平為港「嘔心瀝血」

【明報專訊】曾經參與中英談判、起草《基本法》同香港回歸嘅港澳辦前主任魯平日前逝世，香港唔少政界中人為此感到惋惜。基本法委員會副主任梁愛詩同全國政協副主席董建華噚日出席活動見記者時，都特別提到魯平。詩姐話香港回歸後，魯平仍然好着緊香港，又話自己喺政府工作時，每逢有大事都會請教魯平，對方都會毫不吝嗇咁指點一下。


梁愛詩噚日喺「紀念基本法頒布25周年專題研討會」上講話時不忘提起魯平，指魯平生前為中英談判同《基本法》草擬都「嘔心瀝血、身心交瘁」。董建華就喺「團結香港基金」記者會上形容魯平係好人，兩人亦係好友，阿董話全靠當年魯平為港人發聲，基本法先可加入普選特首嘅條文。