立會佔區 有人起木屋

【明報專訊】金鐘立法會外嘅添美道至今仍然有唔少帳篷，亦有佔領人士繼續留守，近日更加有人用卡板嘅木整咗間木屋出嚟，唔通佔領者諗住起埋屋？

將移灣仔 反映無屋住問題

一直喺立法會外佔領嘅外籍牧師Bob就話，木屋係佢嘅意念，但唔打算放喺添美道，原來佢一直幫緊露宿者，話其中灣仔區有個68歲嘅露宿者，因為無屋，連綜援等都申請唔到，於是佢諗到整間木屋畀人，「住」喺灣仔區域法院外，以控訴香港好多人無屋住。


Bob話呢間屋已經整咗4、5日，仍未完成，佢話香港唔少人都無地方住，將呢間屋放喺灣仔，希望可以話畀人知呢個問題有幾嚴重，間屋整好就會用有轆嘅板車推去灣仔，又話如果呢間model house成功嘅話，唔排除會整更多木屋喎。有份幫手整屋嘅佔領人士話，所有材料都係執番嚟，如果到時呢間屋無立即被拆，仲會幫該名露宿者整埋牀、太陽能板等，解決電力問題。


民建聯葉國謙話立法會對出地方唔係工場，絕對唔識合喺嗰度起木屋，加上附近有大量帳篷，已經影響立法會人員出入。佢話，唔明點解路政署或食環署會容許有人搭建木屋或帳篷，考慮喺中西區區議會跟進事件。