馬雲生日願望係「使錢」

【明報專訊】噚日，第7屆網商大會喺杭州人民大會堂舉行，會上阿里巴巴（1688）主席馬雲，同eBay總裁兼CEO約翰（John Donahoe），有一段真情對話。咁啱噚日係馬雲生日，被主持人問到10年後嘅理想生活係乜？馬雲話，10年後佢希望用一半時間去沙灘曬太陽，另一半時間用嚟使錢。

噚日，馬雲同昔日對手、今日朋友eBay CEO約翰，一齊出席網商大會，會上有一個對話環節，談及對未來電子商務及10年後生活作出展望。

馬雲話，電子商務會改變人們嘅生活，仲話希望未來50%企業使用電子商務。約翰就指出，希望10年後互聯網更加安全，能夠帶來更多幸福感，讓大家交流更加順暢。

eBay總裁想做籃球明星
隨後，主持人問及兩位10年後嘅生活夢想，馬雲就話，希望50%時間喺沙灘曬太陽，另外50%時間放喺使錢上。佢所謂嘅使錢，唔係日日去使錢買享受，而係用錢喺社會上，回饋社會咁話。不過，馬雲話，其實佢最終嘅夢想都仲係去教書。

咁約翰嘅理想生活係點？佢話，希望10年以後，可以好似NBA球星高比拜恩咁去打比賽，或者成為職業高爾夫球選手。隨後約翰都好坦白咁話，呢啲夢想都唔太可能實現，因此就將夢想改一改，就係希望兒孫滿堂，話希望有20個孫仔孫女吧。

報料電郵﹕piano@mingpao.com