王浵世新書細說匯豐歷史

【明報專訊】前匯豐中國業務總裁、去年又從民生銀行（1988）退下火線嘅王浵世，早前出版《北上管理的藝術》賣個滿堂紅之後，最近又出咗本新書，名為《香港•上海•匯豐故事》。封面係一頭獅子，內容講王浵世自73年加入匯豐後嘅所見所聞，配合匯豐發展嘅歷程，儼如一本人性化嘅歷史書。現任匯豐中國董事長鄭海泉仲幫佢寫序，連鄭都佩服佢嘅寫作速度。

見證魚翅撈飯嘅日子
王浵世向小琴娓娓道來一啲較深刻嘅篇章。佢拎起本書，翻到一頁，有幅黑白相片，係前匯控（0005）主席龐約翰（John Bond）率領一眾高層，與當時嘅國務院總理朱鎔基會面，朱鎔基同佢哋逐一握手，除咗有當時嘅亞太區主席艾爾敦（David Eldon）、我哋熟悉嘅華人大班鄭海泉、仲有當時喺香港擔任司庫嘅歐智華（Stuart Gulliver）。

小琴有幸率先一睹新書嘅內容。王浵世由佢做匯豐見習生寫起，見證70年代股市大漲、魚翅撈飯嘅日子，又目睹自動櫃員機（ATM）嘅面世，亦曾被外派往其他地方培訓、做開荒牛。

其中一節講到匯豐剛買美國Household International（現稱匯豐融資），進軍北美消費金融市場，佢本人目睹整個收購過程。該章節雖並未有大揭秘，但都形容咗消費金融同匯豐嘅傳統業務截然不同，亦分析兩間公司嘅企業文化完全唔同，一早存在隱憂。結果06年美國樓市泡沫爆破，成為呢幾年匯控嘅夢魘。