仁濟醫療內訌 累股價挫17％

【明報專訊】近年轉型做醫療概念嘅中國仁濟醫療（0648，前身為軟庫發展），日前再將行政總裁炒魷魚，但今次就出咗事，事關被炒嘅行政總裁郭保平反擊，指公司炒佢魷魚係未照公司章程行事。公司董事鬧不和，令股價昨日急挫17％。

今年5月中，足總前主席余錦基之子余仲行，都突然畀仁濟醫療董事會免去所有職務。不過，余仲行接受本報查詢時話，自己都唔明白發生咩事。本月8日，仁濟醫療發出通告指出，大股東李覺文已悉數沽出18％股權，仲辭去所有職位，通告聲稱，接貨嘅新大股東係中央人民政府所屬嘅中國科學院計算技術研究所旗下一家海外註冊公司。大股東換人後，公司就宣布免去行政總裁郭保平及執行董事王海嘅職務，即時生效，原因係兩人經營理念與公司不符。

不過，1日之後，仁濟醫療又發出通告話，郭、王兩人被免職後，召開董事會議，議決佢哋被炒未有按照公司章程規定嘅通知期限，亦未獲其他董事一致議決通過。但仁濟醫療就反駁，炒佢哋兩人符合規定，仲反指佢哋兩人未經授權就舉行董事會。總之，雙方互相指摘，結果拖累股價急跌。