財爺：返屋企呃細路

【明報專訊】香港記者協會噚晚舉行47周年晚宴，筵開50席，唔少政商界人士都畀面買枱，或者到場支持，其中擔任主禮嘉賓嘅財政司長曾俊華，致辭時大放笑彈，相信近年都無乜高官可以贏到記者咁多掌聲。


財爺致辭時係咁窒政壇名人，佢話記協曾經建議佢拎結他jam歌，一邊訪問另一嘉賓《明報》前總編劉進圖，佢笑住話以為記者覺得官場中只係得周一嶽識唱《忘不了你》、特首梁振英同傳媒老總唱《朋友》，無諗過記者會覺得佢都多才多藝。佢話自己唔打算唱歌，要唱都返屋企對住兩個孫唱，呃吓細路算喇。「呃細路」呢句話，唔知會唔會令在座人士情緒失控呢？


財爺又話，驚自己講得太長太悶，搞到大家瞓晒，或者拎iPad出嚟睇相，聽到呢度，連在場嘅泛民議員都笑得好開心。


臨尾佢都推銷政改，全場即刻噓聲四起。


記協主席岑倚蘭致辭時就認真得多，佢話傳媒受到「五風」威脅，包括襲擊新聞界嘅腥風、自我審查嘅把風、經營困難嘅冷風，仲有係政府嘅吹風，同荒謬歪風。


劉進圖分享贏全場掌聲

去年遇襲嘅明報前總編劉進圖，喺晚宴分享康復歷程，由深切治療部時嘅相片，到需醫護人員協助坐上輪椅，又提到喺醫院過生日，朋友預備咗代表新聞自由嘅藍絲帶蛋糕，「可惜藍絲帶已經變咗質」。在場嘉賓見到劉進圖都報以熱烈掌聲。


記協晚宴當然要籌款，噚晚連同買台同籌款環節，一共籌到157.6萬。