數字王國炮製「鄧麗君」演唱會

【明報專訊】3月至今股價已經炒起逾5倍嘅數字王國（0547），呢排唔止股價升幅引人注意，仲用虛擬技術「複製」鄧麗君，上禮拜六喺台北小巨蛋開演唱會，紀念歌后逝世20年。


雖然話就話係虛擬人物，但今次演唱會一場都有7000名觀眾參加，證明鄧麗君仲係好受歡迎。講開數字王國，佢舊年全年業績先啱啱由虧轉盈，若然今次佢技術用得好，唔知業績會唔會蒸蒸日上呢？尤其上一輩內地人舊時慣咗日頭聽「大鄧」（鄧小平），夜晚聽「小鄧」（鄧麗君），况且數字王國嘅內地收入比例都又佔總收入37%咁多，隨時係條水源。不過，鄧麗君生前就矢言內地一日未由三民主義統一，一日都唔去內地唱歌。雖然家內地未必有三民主義，但恐怕早已不乏資本主義，所以對於鄧麗君嗰把被指為象徵資本主義嘅「靡靡之音」，如今內地應該中門大開。


email: piano@mingpao.com

[小琴密語]