張華峰call員工 「自願落嚟」撐政改

【明報專訊】由港區人大代表、全國政協委員組成嘅香港友好協進會，噚日拉大隊去「保普選反暴力大聯盟」嘅街站簽名撐政改，一班全國政協常委齊齊現身，不過表現得最落力嘅唔係呢班協進會嘅領導，而係身兼全國政協委員嘅金融服務界立法會議員張華峰。張老闆噚日仲主動打電話畀公司同事，叫佢哋落嚟簽名，但講到明係「自願嘅，唔需要有壓力」。


友好協進會會長戴德豐、秘書長盧文端、副會長洪祖杭同林樹哲，都係全國政協常委級人馬，平時都係「車出車入」，唔知係咪因為唔係幾慣企喺街，佢哋簽完名、影大合照，接受訪問後就離開嘞，同市民無乜交流。


強調無強迫 「樓下等佢哋」

反而全國人代楊耀忠就蒐集到唔少簽名。本身同為政協嘅張華峰就企都唔夠，仲打電話畀同事，叫佢哋落嚟簽名，但同記者講明「無強迫㗎吓」，似乎好驚人誤會。而佢同同事交代時亦好「均真」，話「自願嘅，唔需要有壓力」，但話中午12點後會喺「樓下等佢哋」。有口痕友喺旁邊話，不如「唔簽下年就無人工加」，張老闆無表態，只係繼續笑笑口，又話業界九成九都支持政改通過。