續請搭電車渡輪

【明報專訊】香港總商會5月29日慶祝創會154周年，一如以往幾年，總商會當日會請市民全日免費乘搭電車全線，同兩條來往尖沙嘴到中環以及尖沙嘴到灣仔嘅渡輪航線。總商會星期五起會租用10輛電車，向市民宣傳「總商會為商界發聲，齊心促進香港經濟繁榮」信息。


今時今日市民可能上網多過行街，總商會總裁袁莎妮話，市民喺本月15日至下月11日，只需拍攝包含總商會同參與會員商標嘅相片上載到Instagram，寫#freerideday2015，再標籤同關注HKGCC CHAMBER，就有機會獲得總商會送出嘅獎品。


總商會早前舉辦「電車車身設計比賽」，知專設計學院兩名學生陳緯程同莫倩妍嘅設計脫穎而出，作品以五彩繽紛嘅積木勾勒出繁榮嘅香港景象同古老漁船「鴨靈號」，總商會主席彭耀佳話，電車同小輪與商會同樣擁有百年歷史，希望藉活動回饋市民。佢又話，若政改通過，會對香港營商環境產生正面影響，佢唔希望再出現佔領行動，希望各人發表自己意見時，亦需尊重他人自由。