有人扮政府做調查 統計處報警

【明報專訊】政府統計處噚日出稿，話近來接到數名巿民查詢，有人以「政府統計處」名義打電話畀市民，藉詞做統計調查，向市民蒐集與統計處工作範疇無關嘅資料或意見，經查證後，確定有關電話訪問並非由該處做嘅。統計處話事件已交警方處理，若有巿民接到以「政府統計處」來電訪問，千萬要小心。如有懷疑，就打電話（2882 4620）向統計處了解。


其實Emily早兩日都收過類似電話，有個女人打Emily手機話「呢個係政府嘅調查」，想問一啲民生非政治項目，Emily好奇就反問佢係政府邊個部門，該女子就話係「調查處」，吓？咁Emily就再追問乜嘢調查處啦，對方就嗱嗱淋收線。


中大被冒認 促校友注意

其實近來都有唔少呢類假調查，電話、電郵嘅都有，中大學生會噚日都出咗個澄清，話有人冒認佢哋發電郵畀其他中大同學，做政改問卷調查，提醒中大學生同校友注意。