湯家驊又被點名

【明報專訊】法律界噚日有個論壇，請咗民建聯大狀馬恩國、立法會議員謝偉俊同公民黨湯家驊（Ronny）、新界關注大聯盟發言人何君堯同台論政改。Ronny作為席間唯一泛民人士，一如所料成為被游說對象，仲畀何君堯點名為心水轉軚議員。


貼莫乃光馮檢基5人

何君堯噚日大耍軟功，話對Ronny好有期望，仲貼Ronny同資訊科技界莫乃光、民協馮檢基、醫學界梁家騮、衛生服務界李國麟5人會支持政改方案。


湯家驊：山埃貼士

建制派軟硬兼施游說，Ronny亦唔弱，左一句反擊馬恩國將篩選當遴選、右一句批評謝偉俊口中嘅擁抱政治係「無感情嘅擁抱」，不過最致命嘅應該係佢形容何君堯嘅轉軚名單係「山埃貼士」，連謝偉俊都忍唔住話何君堯佢係「局外人」，唔喺議會，亦唔認識上述名單上嘅泛民議員，唔明佢哋嘅性格同擔心啲咩喎。