曾鈺成生日會 正印現身

【明報專訊】神秘嘉賓曾太以攬代吻

星期日係立法會主席曾鈺成68歲生日，噚日立法會一眾議員，包括泛民、建制，都一如以往同曾主席開生日會預祝。不過，今年竟然唔見黨友蔣麗芸（Ann姐）嘅身影，反而曾主席太太以神秘嘉賓身分出席。黨友何俊賢話，請曾太到場係因為要請「正印」向曾主席獻吻。但曾太怕醜，唔敢惜主席，最後只係攬咗一下。


Ann姐過去兩年都有同曾主席一齊開生日會，前年仲獲曾主席獻吻，但曾主席事後話「老婆嬲咗我3日」。今次Ann姐唔去佢生日會，唔通同「正印」有關？Ann姐話噚日因為要出席一個飯局，所以唔得閒。仲話過去「掹衫尾」同曾主席一齊慶祝生日，有啲尷尬。


蔣麗芸有飯局 無一齊慶祝

噚日除咗民建聯黨友同建制派議員，泛民多名議員都有去，包括民主黨劉慧卿、單仲偕、公民黨梁家傑，以及功能組別嘅葉建源同李國麟。


今年黨友無送寓意剪布嘅「剪刀蛋糕」畀曾主席，反而送上有甜有酸嘅水果蛋糕，象徵立法會包容唔同意見。至於今年有乜嘢生日願望？曾主席話係「四個字」，但講咗就唔靈，唔通係「當選特首」？曾主席笑言肯定唔係，咁一定係「政改通過」啦，佢就話「總之係對香港好」。