今年7．1多1秒鐘

【明報專訊】今年7月1日除咗係香港回歸18周年，仲係特別長嘅一天，但只係比平時多咗1秒，加呢1秒，係用嚟配合地球嘅步伐。


至今共加26次閏秒

天文台科學主任許大偉話，人類計時以地球自轉速度為基礎，但地球轉速愈來愈慢，反而唔夠協調世界時間嘅原子鐘計時咁準確，所以不時要調校一下個原子鐘，令兩者同步，如果唔係就會出現「時差」，而位於巴黎嘅國際地球自轉事務中央局（IERS）就負責決定幾時加入閏秒。


自從1972年有協調世界時以來，至今總共加咗26次閏秒，對上一次係2011年7月1日，最多係1972年，一次過加咗10閏秒；嚟緊就會喺7月1日7時59分59秒同埋8時正之前加1秒。天文台話，如果唔加閏秒，天文現象出現嘅時間會慢慢往後移，100年後日出日落時間會比家遲兩三分鐘，好似分別不大，但到咗700年後，就會相差半個鐘，到幾萬年後，太陽就會喺下午6時先至升起，或者早上6時落山，變成日夜顛倒喇。