希慎泊單車 日租唔使3毫子

【明報專訊】街邊單車泊位見得多，喺商廈有單車泊位你又見過未？香港商業核心區人多車多，上班族日日迫巴士地鐵返工外，有商廈為上班族提供新選擇。希慎（0014）銅鑼灣希慎廣場，最近加強推廣單車泊位，畀「踩單車」一族安心「泊車」。


小琴發現希慎廣場原來提供咗24個單車泊位，發展商喺今個月推廣後，即刻收到商廈租戶查詢。聽聞單車車位每年只收100元，即係話平均每日租金3毫子都唔洗。


商廈罕有推出單車位租賃，不過需求究竟有幾多？原來最重要係視乎商廈嘅租戶類型。希慎寫字樓租務總監葉慕貞講，公司喺銅鑼灣咁多座商廈入面，而家就有27家租戶屬資訊科技、媒體和電訊行業，租用樓面20萬方呎，佔總樓面大約10%。目前該批商廈呎租介乎50至80元，今年已經有超過3分1商戶完成續租，新租就平均加咗13%。


email: piano@mingpao.com

[小琴密語]