郊野護理員最常巡新娘潭

【明報專訊】唔少市民鍾意間中行山親親大自然，而一班漁護署郊野公園護理員就天天守護大自然，當大部分人朝早迫巴士去市區返工，佢哋就向住翠綠山巒進發，究竟呢份工寫唔寫意嘅呢？高級郊野公園護理員周國華話，佢哋喺郊野公園執勤時通常兩人一組，最多就係去新娘潭瀑布巡邏，因為石澗喺山坑中心，若遇上山洪暴發會無路走，所以每次見到遊人喺瀑布附近或石澗逗留，就會勸佢哋走。


漁護署舊年取消越野單車許可證制度，市民唔使申請就可以盡情踩越野單車，市民開心，但護理員就多咗樣工作，就係提醒遊人安全使用越野單車路徑。


有30年年資嘅高級郊野公園護理員陳愛強仲話，印象最深嘅係巡邏時遇上各種野生動物，如野豬、赤麂、蟒蛇同箭豬等。曾參與八仙嶺大火救援工作嘅周國華就提醒讀者，除咗要平平安安，亦要愛護環境，同自然和諧共處，「即使係一場小山火，都足以破壞大家幾十年護林和保育嘅心血」。