學民籲勿再「密室談判」

【明報專訊】民主黨主席劉慧卿同學民思潮發言人黃子悅，噚日罕有現身同一記者會撐「全民拒絕假普選運動」，但就幾乎擦出火花。話說朝早學民思潮喺facebook專頁上，上載一張卿姐同黨友喺2010年入中聯辦嘅相，仲夾附一篇聲明，呼籲泛民要堅拒「密室談判」，唔好重演「2010年的轉軚歷史」。卿姐下晝就主動不點名回應，話唔會接受「同枱」嘅人嘅指摘。


上載民主黨入中聯辦相

記者會原本係講「全民拒絕假普選運動」落區同集會嘅細節，卿姐喺記者會上話，好同意有與會者講到大家唔應該互相攻擊，但佢話鋒一轉，指「今日已經有人喺網上攻擊我哋民主黨，亦都話2010年係犯錯，有人有不同意見呢個我哋尊重，但我唔會接受呢個係錯」。


卿姐話，「如果大家坐埋呢張枱，係咁樣指摘，亦都放晒啲嘢喺網上指摘民主黨，我話畀大家聽，我哋係唔會接受嘅」，又話佢已經講過，如果再有2010年一人兩票方案，能令政制行前一步，一定支持，希望大家用包容嘅心態做嘢，否則好難搞。


由於卿姐都講得比較突然，在場團體都無乜反應。同枱嘅學民發言人黃子悅事後話無指摘同路人嘅意思，佢話記者會上都有提樂見泛民議員加入運動，證明佢哋有否決政改嘅決心，只係相信有相當部分市民對2010年嘅情况有憂慮，所以以呢件事做例子，希望議員能堅守崗位。