調查：七成半人撐立法管象牙貿易

【明報專訊】全球唔少地方仍然都有偷獵象牙，有保育團體早前委託港大做調查，訪問1021人，結果顯示有75.5%受訪者支持立法規管象牙貿易，佢哋又問受訪者對大象嘅知識，有71%受訪者知道，偷獵者會將大象殺死以便摘象牙，但得34%人知道，以家偷獵數目計算，非洲大象將會喺大家有生之年就絕種。


市面難分「合法」或偷獵品

民建聯議員葛珮帆（EQ）噚日聯同野生救援組織開記者會，EQ話市民已清楚要求政府立法禁止象牙貿易；野生救援代表Alex Hofford話，香港一直係非法象牙嘅轉口港，法律未能有效監管，喺唔用價錢高昂嘅放射性碳分析技術下，無可能知道市場上嘅象牙係屬於所謂「合法」定係偷獵品。團體要求政府要立法全面禁止象牙貿易，並要求貿易商喺合理時間內處置象牙，令象牙唔可以合法買賣。