競爭力 港第2贏星

【明報專訊】瑞士洛桑管理學院（IMD）噚日公布2015年全球競爭力排名，上年新加坡排名跑贏香港喺第3位，香港跌出三甲；今年香港排名就升番兩級去到第2位，僅次美國，並再次超越排第3名嘅新加坡。中國內地則從去年嘅第23名，進步咗少少到第22位，係大型新興經濟體中表現最好嘅國家。


美國第1 中國22

其實，新加坡喺2010年同2014年都試過爬香港頭，兩個地區喺呢件事上可謂瑜亮之爭，而今年大部分亞洲經濟體嘅排名都有下降，主要係受到經濟衰退同基礎建設老舊拖累影響，香港今次唔止入番三甲，仲再贏番新加坡，可喜可賀。


瑞士洛桑管理學院嘅排名，分析全球60個經濟體系嘅經濟表現，今年學院計排名就更重視「可持續性」，包括企業嘅長期盈利能力同創造就業能力。報告顯示，喺各項評分中，香港喺商業效率同政府效率方面都居首位，基建設施亦升6名至第15位，但經濟表現就跌兩名至第9位。


報告話排名高嘅地區都有共通點，就係喺商業效率（business efficiency）指標上有良好表現，即係政府應鼓勵企業創新、負責，企業亦要有能力長期維持利潤，先可以保持高競爭力。