劉業強「擺陣」選鄉局主席

【明報專訊】新界鄉議局下月1號換屆，78歲嘅鄉議局主席劉皇發周四率先宣布唔再角逐連任，佢個仔劉業強噚日去民政事務總署喺灣仔嘅辦公室報名，「子承父業」，參選下屆鄉議局主席。鄉議局兩名副主席張學明同林偉強都有現身為劉業強站台。被問到會唔會憂慮被指「世襲」，劉業強回應：「我估無咁嘅嘢啩！」


被指「世襲」？ 劉：無咁嘅嘢啩

鄉事山頭多，鄉頭間常傳衝突，但噚日一眾鄉頭表面上就幾團結。多個執委包括鍾偉平、鄧賀年、陳東岳、梁福元、林國昌等都有現身齊撐劉業強。劉業強話，係咪參選立法會鄉議局功能界別席位言之尚早，至於參選主席一事，就同老竇討論咗好多年嘞。張學明承認發叔今次嘅決定倉卒，但發叔「年事已高」，以往係一眾新界人「唔肯畀佢退」，其實發叔應該安享晚年。


根據民政事務總署通知，有意參選鄉議局主席及副主席選舉人士，要喺本月27日至6月1日下午2時前向署方提交「願意出任主席/副主席聲明書」，但劉業強噚日擺得出呢個陣勢，相信要挑戰都有啲難度。