齊遞信 建制大封過泛民

【明報專訊】立法會議員喺立法會表決政改前到深圳見京官，泛民議員一早講明會務實赴會，唔會做show，噚日只係預備咗5封信交畀京官表述立場，態度都好和善，最大嗰封信係民主黨嘅，用A4公文袋裝住。港澳辦主任王光亞喺記招總結交流會用英文答問題時就帶笑話，會上各表立場，氣氛唔差，仲話無人行為激進，情况唔尋常。噚日同樣唔尋常嘅係建制派亦有交信，仲要係一封大型道具信。


林太叫漏梁家傑

噚日嘅交流會由政務司長林鄭月娥主持，林太喺開始前，逐一安排民協馮檢基、教協葉建源、工黨何秀蘭同張國柱、民主黨黃碧雲按次序向京官遞信。點知其後林太就叫民建聯譚耀宗出嚟，現場建制派有人拍手和應，亦有人喺座位上大叫「你都有」？


梁美芬撩人送書

只見譚sir拎住一封41名建制派議員聯署撐政改嘅道具信交畀京官，重申佢哋撐政改嘅立場。之後唔尋常嘅事一單接一單，例如林太叫漏咗飯盒會召集人、公民黨黨魁梁家傑出去遞信，最後要傑哥提醒林太先記得。


唔知係咪大家送「禮物」送得太開心，經民聯梁美芬噚日亦左擰右擰四圍撩人同佢一齊出去，送本關於一國兩制嘅書畀王光亞，不過最後無咩人理佢，但仍無損梁美芬嘅雅興，自己一個走出去送書。