Amber再膺全球50佳餐廳

【明報專訊】英國權威飲食雜誌《餐廳》（Restaurant）公布2015年度「全球最佳50間餐廳」，香港餐廳榜上有名，就係連續5年入榜嘅置地文華東方酒店餐廳Amber，但比去年跌咗14級，排第38位。呢間餐廳主打有創意嘅法國菜，例如招牌小食「鵝肝珍寶珠」，粒「珍寶珠」換咗沾上紅菜頭汁嘅鵝肝。Amber廚藝總監Richard Ekkebus話，連續5年入榜推動佢哋繼續進步，為客人做出難忘菜式。


排行榜亦列出第51至100位嘅餐廳，香港有另外兩間餐廳入選，包括排第62位嘅意大利餐廳8 1/2 Otto e Mezzo Bombana，呢間餐廳係旅發局主席林建岳開嘅，佢同餐廳名廚相識超過20年；另一間係排第99位嘅四季酒店龍景軒。


而今年由三兄弟主理嘅西班牙餐廳El Celler de Can Roca重登榜首，餐廳主打加泰羅尼亞菜式，評審讚揚餐廳令食客有家嘅溫暖；意大利餐廳Osteria Francescana同上年榜首嘅丹麥餐廳Noma分別排第2同第3位，內地就有3間上海餐廳入選全球100大。