錫住小白腰雨燕 中大建築獲獎

【明報專訊】香港綠色建築議會最近公布全港院校綠建版圖，根據HK-BEAM（建築環境評估法）同BEAM Plus（綠建環評）頒獎，中文大學奪最多獎，有13個獎（綠色建築認證標籤），包括透過方位規劃、屋面綠化、自然採光、用再生能源同智能設備、用低排放環保物料等節能同減廢。


5項目奪最高榮譽

中大共有5個建築項目奪得最高榮譽白金獎，當中康本國際學術園中間有個紅色桶狀空間，可以畀學生入內了解交流活動資訊，而玻璃外牆透光，可以唔使開咁多燈，校方規劃康本國際學術園同龐萬倫學生中心時，亦保存咗建築範圍內極具價值嘅刺竹及落羽松。中大大學圖書館擴建部分亦攞咗白金獎，校方透過開發地下空間，完整保留烽火台，亦考慮咗點樣保育圖書館外牆嘅小白腰雨燕。