獐子島扇貝「復活」

【明報專訊】上年，A股上市公司獐子島上演咗一場真人騷《扇貝去哪兒》，74億粒扇貝喺一夜之間死無全屍（公司話），不過到噚日又突然公布，話最新抽查發現啲扇貝好健康，公司仲停牌打算配股集資，搞到網民都驚呼「扇貝終於游番嚟啦」。


話說四年前，獐子島用咗5億人民幣，放咗74億粒扇貝苗落海，點知上年竟然話全部死哂！官方就話，起撈個時遭異常凍水流入，股民話「生要見扇，死要見殼」，結果管理層話死殼都冲走埋，信不信由你。年尾業績可想而知，據獐子島2014年年報顯示，總共虧損咗11.56億，班股民真係欲哭無淚。


至於今次查嘅扇貝，獐子島管理層話唔係死後復活，之前死無全屍嘅係2011年播嘅種，而家抽查批，係2012年後播嘅種，所以而家健康係好正常嘅，而呢個值得令人留意嘅消息，係喺獐子島停牌籌備緊批股後公布。投資A股真係要打醒十四分精神，如果唔係就會好似啲扇貝咁，渣都無得剩。


[小琴密語]