惡搞黃碧雲banner 叫人唔好選泛民

【明報專訊】近日太子、旺角等地方，都見到印有民主黨黃碧雲相片嘅banner，印住佢著住「交叉」T恤嘅相，旁邊寫住「泛民（╳）普選、選民（╳）泛民」，搞到睇見banner嘅市民都一頭霧水，打去民主黨問下乜事，碧雲至發現原來畀人惡搞，冒佢名整咗假banner，佢已經報警、通報食環署。


碧雲話，職員後來喺旺角、太子甚至觀塘都發現同一條banner，大約有10條咁多，banner無下款，唔知係乜嘢人搞出嚟，佢笑住話掛banner嘅人好似知道佢行蹤咁，發現嘅地方就近住民主黨總部、佢哋區辦事處之餘，連佢爸爸屋企樓下都有！碧雲呼籲市民如果見到呢條banner，請向民主黨舉報，等佢哋處理番。


中聯辦主任張曉明早前同立法會議員見面，講明泛民否決政改可能會「票債票償」，碧雲話今次被惡搞可能係「票債票償」嘅開始，相信呢類事情陸續會有。


民主黨副主席羅健熙就話，預咗民主黨會畀人惡搞，但佢唔係好擔心呢張banner會影響佢哋，相信市民眼睛係雪亮，况且呢張banner內容騎呢，佢睇咗成分鐘先至明白講咩。