《2022香港家書》話後悔

【明報專訊】一到周末，又係高官變身鍵盤戰士嘅時候，噚日民政事務局長曾德成同財經事務及庫務局長陳家強就先後喺blog拉票，呼籲立法會議員通過政改。有網民見局長拉票拉得咁開心，就以政務司長林鄭月娥嘅角度拍咗一段《2022香港家書》反對袋住先，講女主角5年後對政改悔不當初。


片中主角無話係邊個，但佢話執筆家書嗰時，政改已通過，而佢去英國同家人團聚前寫香港家書，寫信畀「約希」，同林鄭囝囝同名，咁女主角係邊個就不言而喻。主角細訴當年推動政改，叫泛民放棄理想，但通過後嘅變化係佢始料不及，令佢內心唔好受。女主角背影、講嘢用字、語氣都同林鄭有幾分似，亦有林鄭嘅相片穿插。片中話通過政改後，梁振英連任，而陳茂波就做政務司長，女主角就退任，轉做行會成員！


Emily聽聞，短片劇本出自真實主角一個相識超過30年嘅舊朋友，而製作團隊全部義務參與，希望話畀一啲以為「袋住先」點都好過無嘅人聽，唔使過好多年，佢哋就會發覺自己好心做壞事，追悔莫及。