慢必溫馨提示跟蹤者﹕下次咪著粉紅波鞋

【明報專訊】近年嚟每次有高官落區，警方都會嚴陣以待，啲官去邊度，附近一早就有大批軍裝同便衣警察出現；而人民力量立法會議員陳志全（慢必）噚日落街食早餐時，就話被兩個疑似便衣跟蹤，不過跟蹤者就被佢發現咗，慢必噚日喺facebook溫馨提示，勸喻如果跟蹤者係警員嘅話，咁下次跟蹤人時就記住唔好著熒光粉紅波鞋咁搶眼喎。


疑警跟蹤 警拒評網上言論

慢必話，佢噚日大約10點落街食早餐，發現唔少戴耳機嘅男人、小量警察喺屋企附近，仲有個著住熒光粉紅波鞋嘅男人喺附近出現。佢笑言由於對方都幾靚仔，所以佢都點咗人相，而佢後來由炮台山行到去天后，發現呢名男士仲喺度，就咁睇落似喺度等人，慢必都無留意，但後來佢返到屋企，該男子又企喺佢屋企大廈對面間中學外。


後來慢必知道，原來特首梁振英（CY）噚日就去到城市花園附近一間中學出席活動，令佢估計該名跟咗佢一個幾鐘頭嘅男人可能係警察，相信對方係驚佢對CY有咩行動喎。Emily就事件問過警方，警方就話唔會評論個別網上言論。


網民超市捕獲野生CY

CY噚日上午去咗北角，出席亞洲防盲基金會舉辦嘅「光明行動」嘉許禮，鼓勵市民捐贈器官幫助病人。不過，有網民噚日亦喺超市「捕獲」CY拎住購物籃買壽司，而其後CY個女梁齊昕喺社交網站上載圖片，話同阿爸歎壽司。