否認搵人扮本土 侯志強﹕我哋900年歷史

【明報專訊】范國威轉傳「『侯X強』搵人」信息

新民主同盟立法會議員范國威噚日發新聞稿，指社交網站流傳「侯X強」請人假扮示威者，於是佢基於呢個流傳，高調去質疑有建制組織打算喺下周審議政改日集會期間，乘機搗亂，嫁禍本土派。Emily搵咗上水鄉事委員會主席侯志強求證，侯志強話自己絕對無做過好似社交網站流傳嘅事，表明政改表決當日「諗都無諗過去立法會」，唔會動員去撐政改，亦無人搵佢。侯志強仲好有霸氣咁話，自己根本唔使搵人扮本土派，「我哋有900幾年歷史，我至係本土」。


范國威話有北區水貨客關注組成員喺facebook發布一則消息，話喺上水偷聽到「侯X強」同一個20幾歲男人對話，其間「侯X強」囑咐對方「果幾日最緊要搵多d人」、「記得話係無錢既（嘅）」，范國威懷疑同下周三6月17號政改示威有關。


Emily搵咗侯志強，佢話自己明人不做暗事，批評范國威亂噏、無聊，話自己事前一無所知，都係透過記者先知道呢件事。侯志強仲話，如果范國威有「千分之一」嘅證據，可以拎去上水鄉事會對質，「我朝九晚五喺度等佢」。