學生邀合照 樹根笑言有fans

【明報專訊】民建聯定期都會整工作報告派畀市民，最新一期《建報》講今年該黨立法會議員工作嘅報紙亦出版，主席李慧琼、譚耀宗、鍾樹根、蔣麗芸等一眾議員，齊齊去到灣仔莊士敦道港鐵站外派報。民建聯總共印咗35萬份報紙派街坊，成本唔算好平，12個議員每人科水3萬蚊印製。


用「tree gun English」 外國人明

Emily所見，民建聯喺地區支持度都幾高，唔少人欣然接過報紙，天氣酷熱，有人一收完報紙立即用嚟撥涼。除咗派嘢，蔣麗芸嗌咪時不忘叫市民撐政改。


鍾樹根作為港島議員遇到唔少fans，有中學生停低同佢合照，佢同Emily講笑話自己的確有少少fans㗎，相信如果去佢老區柴灣，效果更好，隨時半個鐘就派晒出去喎。佢又同Emily講，連外國人都留意佢哋派報，問佢哋做乜，佢就用英文叫人上網search吓DAB（民記英文簡稱），因為佢哋係第一大黨喎。Emily問樹根用英文同外國人講，人哋明唔明先，佢就笑言自己用「tree gun English」，都可溝通到嘅。


《建報》用兩大版講「撐普選、反佔中」，佢哋民生工作亦講唔少，好似提到要推動漁農業轉型發展、關注動物福利等。