新聞類別
財經
詳情#
【明報專訊】有「發電女王」之稱嘅中國電力（2380）主席李小琳，近排因為母公司合併後意外無得留低，被外界重點關注，佢噚日「例牌」缺席中國電力股東會，小琴同小股東傾開，佢猛讚李小琳樣靚身材正，不過就唔介意佢離開：「唓，反正佢（股東會）都唔出現，以後公司做得好就得啦。」
中電投集團最近宣佈同國家核電合併，響中電投做咗12年嘅前國務院總理李鵬女兒李小琳，據講唔止冇份留低做新公司管理層，而且仲要外調去大唐集團，有內地媒體仲話，李小琳聽到呢個任命曾經大力摔門。
雖然媒體噚日想趁中國電力（2380）開股東會見下女電王，不過李小琳最後都無出席；而主持股東會嘅行政總裁余兵就話，無論係人事定母公司合併後會唔會注資等等事宜，暫時冇新嘢，可以披露嘅都已經公告。
咁班小股東又點睇佢呢？有小股東張先生就話，自己每年出席股東會，但除咗IPO果時見過李小琳，就再冇見過佢出席股東會，不過印象中覺得李小琳幾靚同身型幾好，著衫亦好睇，不過反正佢都成日唔現身，換唔換都無所謂啦。
email: piano@mingpao.com
[小琴密語]
回應 (0)
